فلسطینی وزارت صحت نے غزہ پر اسرائیلی حکومت کے حملوں میں مزید 200 سے زائد افراد کے جاں بحق اور زخمی ہونے کی خبر دی ہے۔
رپورٹ کے مطابق تازہ شہادتوں کے بعد جنگ غزہ کے آغاز سے اب تک شہید ہونے والے فلسطینیوں کی تعداد 64 ہزار 7 سو 56 ہوگئی ہے۔
فلسطینی وزارت صحت نے ایک بیان میں کہا ہے کہ گزشتہ 24 گھنٹوں کے دوران غزہ پر اسرائیلی حکومت کے حملوں کے نتیجے میں 38 فلسطینی اپنی جانوں سے ہاتھ دھو بیٹھے ہیں اور 200 زخمی ہوئے ہیں۔
اس رپورٹ کے مطابق، متعدد افراد اب بھی ملبے تلے دبے ہوئے ہیں اور ایمرجنسی اور سول ڈیفنس کی ٹیمیں ان تک پہنچنے میں ناکام ہیں۔
غزہ کے اسپتالوں میں بھی گزشتہ 24 گھنٹوں کے دوران بھوک اور غذائی قلت کے باعث دو اموات ریکارڈ کی گئی ہیں، جن میں ایک بچہ بھی شامل ہے، جس سے اس انسانی بحران کے متاثرین کی مجموعی تعداد 413 ہو گئی ہے، جن میں 143 بچے بھی شامل ہیں۔
