پیغمبر اکرم و اہل بیت پیغمبر کی سیرت وتعلیمات امت مسلمہ کے لئے مشعل راہ ہیں، قائد ملت جعفریہ پاکستان
اسلام آباد/ راولپنڈی 10ستمبر 2025 : قائد ملت جعفریہ پاکستان علامہ سید ساجد علی نقوی نے ختمی مرتبت‘ محبوب خدا ‘ پیغمبر اکرم ‘ امام ششم حضرت امام جعفر صادق ؑ کے میلا د مسعود اور ہفتہ وحدت کے اختتام پر امت مسلمہ کو ہدیہ تبریک پیش کرتے ہوئے اپنے پیغام میں کہا ہے کہ قرآن کریم کی تعلیمات کے مطابق یہ امت ‘ امت واحدہ ہے اور پیغمبر گرامی کی ذات بابرکات وحدت و اخوت اور بھائی چارے و یگانگت کا مرکز و محور ہے اور انکی حیات طیبہ اور سیرت و کردار ہم سے یہ تقاضا کرتا ہے کہ جب ہمارا پختہ یقین ہے کہ ہم سب کا ایک خدا‘ایک رسول ‘ایک قرآن اورایک کعبہ پر ایمان ہے تو فروعی نوعیت کے اختلافات کا حل مہذب انداز میں‘ شائستگی کے ساتھ علمی سطح پر ڈھونڈنے کی عادت ڈالنی چاہیے۔ ہمارے اسی موقف کی تائید ہمارے بزرگان دین‘ مراجع کرام اور آیات عظام نے بھی کی اور واضح کیا کہ تمام مکاتب اور مسالک کے مقدسات کی توہین ممنوع ہے۔علامہ ساجد نقوی کا مزید کہنا ہے کہ آل پیغمبر اکرم میں سے امام جعفر صادق ؑنے جس طرح اپنے جد امجد کی سیرت و کردار پر عمل پیرا ہوکر علم کے تمام شعبوں میں امت مسلمہ کی رہبری و رہنمائی کی وہ تاریخ اسلام کا ایک روشن باب ہے لہٰذ ا امت واحدہ کےلئے قرآنی تصور کو عملی طور پر اجاگر کرنے کےلئے تعلیمات قرانی‘ سیرت رسول اکرم اور سیرت امام جعفر صادق ؑسے ہمیں یہ درس ملتا ہے کہ ہم فرقہ وارانہ ہم آہنگی کے فروغ‘ مشترکات پر عمل درآمد‘ باہمی اتحاد و وحدت کی ضرورت ‘ اسلامی دنیا اور استعماری سازشوں کو ناکام بنانے میں اپنا کردار ادا کریں اور پیغمبر اکرم کی تعلیمات کی روشنی میں جدید تقاضوں کو مد نظر رکھ کر عادلانہ نظام کی تشکیل و نفاذ کو یقینی بنائیں۔
پیغمبر اکرم و اہل بیت پیغمبر کی سیرت وتعلیمات امت مسلمہ کے لئے مشعل راہ ہیں : قائد ملت جعفریہ پاکستان
متعلقہ مضامین
