شہید سید حسن نصر اللہ کی مقاومت اور قربانی رنگ لائے گی،قائد ملت جعفریہ پاکستان
قابل فخر سپوت حسن نصراللہ کی شہادت سے اسلامی مزاحمتی تحریکوں کی حمایت میں مزید اضافہ ہوا ، علامہ سید ساجدعلی نقوی
راولپنڈی /سلام آباد 27 ستمبر 2025 ء: قائد ملت جعفریہ پاکستان علامہ سید ساجد علی نقوی کا عالم اسلام کے عظیم فرزند، حزب اللہ کے سربراہ،دفاع بیت المقدس کے علمبردار،اتحاد و وحدت کے داعی، قابل فخر سپوت،حجةالاسلام والمسلمین سید حسن نصراللہ اور ان کے رفقاءکی پہلی برسی کے موقع پر کہنا ہے کہ شہید حسن نصراللہ اس دور کے عظیم مجاہد تھے اور ان کی شہادت سے حزب اللہ کی عوامی تائید و حمایت میں اضافہ ہوا ، بیت المقدس کی تحریک آزادی اور اسلامی مزاحمتی تحریکوں کو تقویت حاصل ہوئی جس کے سبب سامراجی قوتوں کوذلت و خفت اور شکست کا سامنا ہے۔علامہ سید ساجد نقوی کا مزید کہنا ہے کہ شہید مقاومت اور انکی بے مثال قربانی نے عالمی سطح پر منفرد مقام حاصل کیا اور پوری دنیا خاص کر اس خطے میں بڑے پیمانے پر تبدیلیوں کا پیش خیمہ ثابت ہوئی۔
انہوں نے کہا کہ اس وقت گھمبیر صورتحال ہے زمینی حقائق یہ ہیں کہ اس بہیمیت کا مرتکب دراصل سامرا ج ہے،صہیونی ریاست کو ہر قسم کے وسائل ، فنڈز،جدید ترین اسلحہ،ٹیکنالوجی،انٹیلی جنس ، منصوبہ بندی،وغیرہ سامراج فراہم کر رہا ہے اورتمام چیزوں کو اپنی نگرانی میںآپریٹ کرا رہا ہے، اسی کے ذریعے ناجائز صہیونی ریاست اتنی دیدہ دلیر ہوئی کہ دو سال سے غزہ پر قیامت برپا کرنے کے ساتھ لبنان کو بھی جلا کر برباد کر رہی ہے ایسی صورت حال میں عالم انسانیت کو اس وحشت و سفاکیت کو رکوانا ہوگا ۔ علامہ ساجد نقوی کے مطابق پاکستان اتنا اثرو رسوخ رکھتاہے کہ اگر بھرپور سفارتکاری اور مضبوط لابی کےساتھ سامراج پردباﺅ بڑھائے تو غزہ و فلسطین ولبنان میں جاری جارحیت ، سفاکیت،بہیمیت اور درندگی ختم ہوسکتی ہے بلکہ دنیا کو تیسری عالمی جنگ سے بچایا جاسکتاہے۔ انہوںنے مزید کہاکہ غزہ ،فلسطین اور لبنان کے مظلوم عوام کےلئے امدادی سرگرمیوں کو مزید فعال بنانے کی ضرورت ہے،قائد ملت جعفریہ پاکستان نے دفاع بیت المقدس کے علمبردار سید حسن نصراللہ شہید اور انکے رفقاءکی عظیم قربانی کو خراج عقیدت پیش کرتے ہوئے دعا کی خدا انہیں اعلیٰ علیین میں مقام عنایت فرمائے اور حزب اللہ کے مجاہدین کو مشن کو کامیابی کے ساتھ جاری رکھنے کی ہمت اور حوصلہ عنایت فرمائے۔
شہید سید حسن نصر اللہ کی مقاومت اور قربانی رنگ لائے گی،قائد ملت جعفریہ پاکستان
متعلقہ مضامین
