حضرت فاطمہ زہرا سلام اللہ علیہا کی سیرت و کردار خواتین عالم کیلئے مینارہ نور ہے، علامہ سید ساجد علی نقوی
آپ نے علم و کمال ، اعلی تہذیب و اخلاقی اقدار اور قناعت پسندی کے ذریعے مثالی اسلامی معاشرے کو بنیادیں فراہم کیں، قائدملت جعفریہ پاکستان
خواتین عالم کے لئے ماں’ بیوی اور بیٹی ہر زاویہ نگاہ سے بہترین نمونہ عمل اور آئیڈیل شخصیت جناب حضرت فاطمہ زہرا سلام اللہ علیہا ہیں
راولپنڈی/ اسلام آباد 24 نومبر 2025 ء : قائد ملت جعفریہ پاکستان علامہ سید ساجد علی نقوی نے کہا کہ دختر رسول اکرم ۖ حضرت فاطمہ زہرا سلام اللہ علیہا کی سیرت و کردار اور اسوہ رہتی دنیا تک خواتین عالم کیلئے مینارہ نور ہے ۔ علم و کمال ، اعلی تہذیب و اخلاقی اقدار اور قناعت پسندی کے ذریعے مثالی اسلامی معاشرے کو بنیادیں فراہم کیں۔
علامہ سید ساجدعلی نقوی کا مزید کہنا ہے کہ پیغمبر اکرم ۖ کی اپنی ہدایت اور رہنمائی کے مطابق خواتین عالم کے لئے ماں’ بیوی اور بیٹی ہر زاویہ نگاہ سے بہترین نمونہ عمل اور آئیڈیل شخصیت جناب حضرت فاطمہ زہرا سلام اللہ علیہا ہیں، بیٹی کی حیثیت سے رحمت العالمین ۖ جیسی ہستی کے لئے باعث رحمت قرار پائیں’ شادی کے بعد بیوی اور ماں کی حیثیت سے جس نظام زندگی کا نمونہ پیش کیا وہ طبقہ نسواں کے لئے مثالی حیثیت رکھتا ہے ‘ اپنے گھر کے تمام کام اپنے ہاتھ سے کرتیں’ جھاڑو دینا’ کھانا پکانا’ چرخہ چلانا’ چکی پیسنا’ بچوں کی تربیت کرنا’ کنیزسے برابری اور دوست جیسا سلوک کرناان کا وطیرہ تھا ۔ علامہ سید ساجدعلی نقوی نے کہا کہ موجودہ سنگین دور میں امت مسلمہ خواتین کی آزادی کے ان نقوش کی روشنی میں جدوجہد کرے جو جناب حضرت فاطمہ زہرا سلام اللہ علیہا نے چھوڑے ہیں کیونکہ سیدہ فاطمہ سلام اللہ علیہاکی پرورش آغوش رسول ۖ میں ہوئی۔
خواتین کو چاہیے کہ وہ اپنے خاندانی’ ذاتی معاملات سے اجتماعی معاملات تک ہر موقع پر سیدہ کی شخصیت کو مدنظر رکھیں۔ اس کے ساتھ ساتھ اپنی گود سے ایسی نیک سیرت نسلیں معاشرے کو فراہم کریں جو دنیا میں اصلاح لانے کی استعداد رکھتی ہوں ۔
