اسلام آباد/ راولپنڈی۔ 2 دسمبر 2025 ء : قائد ملت جعفریہ پاکستان علامہ سید ساجد علی نقوی کا بزرگ عالم دین’ مولف و مترجم’ معرودف دینی و سماجی شخصیت علامہ سید صفدر حسین نجفی کی 26 ویں برسی کے موقع پر کہنا ہے کہ معاشی و معاشرتی مسائل’ سماجی مشکلات اور نامساعد حالات کے باوجود انتھک محنت’ لگن اور جانفشانی سے ملک کے اندر اور بیرون ملک دینی مراکز’ مساجد اور دینیات سنٹرز کے قیام’ سماجی و فلاحی خدمات’ دینی مدارس کے موسس و مربی کی حیثیت سے گرانقدر خدمات انجام دینے کی بدولت ”محسن ملت” کا خطاب پانے والی نابغہ روزگار شخصیت علامہ صفدر حسین نجفی کی تھی جنہوں نے عوام میں فکر و شعور اجاگر کرنے کے لئے شب و روز کاوشیں کیں یہی وجہ ہے کہ وہ اپنے نام اور کام کی بدولت قوم و ملت کے محسن قرار پائے ۔ علامہ ساجد نقوی کا مزید کہنا ہے کہ ایک مایہ ناز علمی خاندانی پس منظر کی حامل شخصیت مرحوم علامہ صفدر نجفی کا منفر د پہلو یہ بھی تھا کہ وہ ملی امور کے حوالے سے ہمیشہ متفکر رہے اور ہر دور میں ملی قیادت کے شانہ بشانہ کام کرتے ہوئے ملت کی عظیم خدمت کا فریضہ انجام دیا اور ملی پلیٹ فارم کی افادیت و اہمیت سے عوام الناس کو روشناس کرانے کی جدوجہد میں مصروف رہے اسی طرح داخلی وحدت اور خارجی مشکلات کے حل کے لئے بھی کوشاں رہے۔ قائد ملت جعفریہ پاکستان نے یہ بات زور دے کر کہی کہ تصنیف و تالیف کے میدان میں علامہ سید صفدر حسین نجفی نے کارہائے نمایاں انجام دیں اور تفسیر نمونہ کے ترجمہ سمیت متعدد علمی و قلمی آثار چھوڑے جن سے ہر دور میں استفادہ کیا جاسکتا ہے۔
قائد ملت جعفریہ پاکستان علامہ سید ساجد علی نقوی کا بزرگ عالم دین ،معرودف دینی و سماجی شخصیت علامہ سید صفدر حسین نجفی کی 26 ویں برسی پر بیان
متعلقہ مضامین
