سید محمد دہلوی مرحوم برصغیر کے بلند پایہ عالم دین ، خطیب اعظم اور دانشورتھے ، علامہ ساجد نقوی
سید محمد دہلوی نے پرامن سیاسی اور جمہوری طرز احتجاج کی داغ بیل ڈالی اور اپنے مطالبات کو منطقی انداز میں پیش کیا، قائد ملت جعفریہ
حقوق کے دفاع اور تحفظ کی خاطرکارواں آج بھی رواں دواں ہے، سیدمحمد دہلوی کی 54 ویں برسی کے موقع پر پیغام
راولپنڈی/اسلام : قائد ملت جعفریہ پاکستان علامہ سید ساجد علی نقوی کا قائد اول علامہ سیدمحمد دہلوی کی 54 ویں برسی کے موقع پر کہنا ہے کہ علامہ سید محمد دہلوی مرحوم برصغیر کے خطیب اعظم اور ایک برجستہ علمی شخصیت تھے جن کا تعلق ایک معروف علمی گھرانے سے تھا جنہوںنے علمی و سماجی شعبوں میں تصنیف و تالیف ‘ تقریر و خطابت کے ذریعہ دین و ملت کے لئے گرانقدر خدمات انجام دیں۔ مدرسہ ناظمیہ لکھنو جیسی ممتاز علمی درسگاہ سے کسب فیض کیا ۔ ان کا مزید کہنا ہے کہ وطن عزیز کی تشکیل و تعمیر اور سالمیت و دفاع میں عوام نے علماءو اکابرین کی قیادت میں صبر آزما جدو جہد کی اور لازوال قربانیاں پیش کیں جن میںقائد مرحوم علامہ سید محمد دہلویؒ مرحوم کی جدوجہد اور کاوشیں اور ان کے مثبت نتائج نمایاں حیثیت کے حامل رہے یہی وجہ ہے کہ آج بھی ان کی گرانقدر خدمات ناقابل فراموش ہیں۔دور حاضر میں بھی پاکستان کے عوام مختلف مسائل و مشکلات سے دوچار ہوکر بھی ملکی سلامتی اور قومی وحدت کی خاطر صبر و تحمل سے کام لے رہے مگر ذمہ داران صورتحال کی سنگینی کا ادراک نہیں کرپا رہے۔قائد اول علامہ سید محمد دہلویؒ کی 54 ویں برسی کے موقع پرعلامہ ساجد نقوی نے کہا کہ سید محمد دہلوی مرحوم برصغیر کے خطیب اعظم اور بلند پایہ عالم دین اور بے بدل قائد تھے جنہوں نے 1964 میں شیعہ مطالبات کمیٹی اور مجلس علمائے شیعہ پاکستان کے فورمز کے ذریعہ پرامن سیاسی اور جمہوری طرز احتجاج کی داغ بیل ڈالی اور اپنے مطالبات جن میں خاص طو ر پر عزاداری‘ دینیات اور اوقاف شامل تھے، کو منطقی انداز میں پیش کیا اور مثبت نتائج حاصل کئے انہوںنے پیرانہ سالی کے باوجود ملت کی خدمت میں کوئی کسر باقی نہیں چھوڑی۔ اس مشکل دور میں کم وسائل کے باوجود مسلسل اور انتھک محنت سے قوم کو شعور اور اتحاد کی نعمت کا احساس دلایا۔علامہ ساجد نقوی نے مزید کہا کہ مسائل و مشکلات کے باوجود نہ صرف ملی حقوق کے تحفظ ، اتحاد و وحدت کے فروغ اور فرقہ وارانہ ہم آہنگی کی ترویج کے لئے ہمہ وقت جد وجہد جاری ہے۔
