امن کے لیے اتحاد امت مسلمہ کی ضرورت ہے۔ سامراجی سازشوں کے خلاف ماضی کی طرح پاکستانی اور ایرانی عوام متحد ہیں۔ قائد ملت جعفریہ پاکستان

30جنوری2025

قائد ملت جعفریہ پاکستان علامہ سید ساجد علی نقوی نے خطے کے موجودہ حالات پر تشویش کا اظہار کرتے ہوئے کہاکہ ایران پر سامراجی حملہ بڑی غلطی ہوگی ، مشکل کی ہر گھڑی میں ایران اور پاکستان کے عوام ایک دوسرے کے شانہ بشانہ کھڑے ہیں۔ وقت کا تقاضا ہے کہ امُت مسلمہ متحد ہوکر سامراجی سازشوں کا مقابلہ کرے۔

قائد ملت جعفریہ نے رہبر معظم حضرت آیت اللہ العظمی آقای سید علی خامنہ ای کی صحت و سلامتی سمیت انقلاب اسلامی اور ایرانی عوام کے تحفظ کی دعا کے ساتھ کہا کہ سامراج کا ایران پر پہلا حملہ جو عوامی دباؤ کے ذریعے رہبر انقلاب اسلامی اور حکومت کیخلاف بغاوت پر اکسانے ، قتل و غارت گری کا بازار گرم کر نے اور اہم شخصیات کو نشانہ بنانا تھا ناکام ہو چکا۔

اگر سامراجی فوج نے دوسرے مرحلے میں طاقت کا استعمال کرتے ہوئے ایران پر جنگ مسلط کی تو خدا وند کریم کی مدد سے ان ظالموں کو تاریخی شکست کا سامنا کرنا پڑے گا ۔ان شا اللہ رہبر انقلاب اسلامی آیت اللہ العظمی آقای سید علی خامنہ ای کے ہاتھوں غرور، تکبر ، دھونس دھاندلی کا خاتمہ اسلام و ایران کی فتح اور سامراجیت کے زمین بوس ہونے کا نقطہ آغاز ہوگا۔