علامہ سید ساجد علی نقوی نے کہا: شہید علامہ سید عارف حسین الحسینی نے عملی طور پر اتحاد بین المسلمین کے لیے گراں قدر خدمات انجام دے کر پاکستان کے مسلمانوں کو ایک لڑی میں پرونے کی بھرپور کوشش کی۔
قائد ملت جعفریہ پاکستان علامہ سید ساجد علی نقوی نے قائد شہید علامہ سید عارف حسین الحسینی کی 37 ویں برسی پر کہا: 5 اگست تاریخ کا وہ سیاہ ترین دن ہے جس دن قائد ملت علامہ عارف حسین الحسینی کو گولیوں کا نشانہ بنا کر شہید کر دیا گیا، علامہ حسینی کا حوالہ اگرچہ مذہبی تھا لیکن انہوں نے ایک نئی سوچ اور فکر دی اور نئی طرح ڈالی۔ انہوں نے مظلوموں اور محکوموں کے لئے آواز بلند کی اور اتحاد و وحدت کے لئے انتہائی گرانقدر خدمات انجام دیں۔
ہم آج بھی اسی فکر کو آگے بڑھاتے ہوئے تمام تر مشکلات کے باوجود جدوجہد جاری رکھے ہوئے ہیں اور اعلی و پاکیزہ اہداف کی خاطر وجود میں آنے والا یہ کارواں رواں دواں ہے۔
قائد شہید علامہ عارف الحسینی کی شخصیت پاکستان میں آمریت کے خلاف جدوجہد کی علامت تھی۔ مسائل کے حل کے لئے علامہ حسینی نے اتحاد و وحدت اور صبر و حکمت کا راستہ اختیار کیا تھا۔
قائد شہید نے مارشل لاء دور میں جہاں عوام کو ان کے حقوق کا شعور دیا وہاں ہر مکتب کے عوام کو اتحاد و وحدت اور ہم آہنگی کا درس بھی دیا اور عملی طور پر اتحاد بین المسلمین کے لیے گراں قدر خدمات انجام دے کر پاکستان کے مسلمانوں کو ایک لڑی میں پرونے کی بھرپور کوشش کی۔ اسی فکر کو آگے بڑھاتے ہوئے ملت جعفریہ پاکستان اسی راستے پر گامزن ہے اور پاکستان میں عوام کو درپیش مسائل اور اتحاد بین المسلمین کے عملی فروغ کے لیے جدوجہد میں مصروف ہے۔
اسی سلسلے میں اتحاد و وحدت کے وہ تمام فورمز تشکیل پائے جن کی تاسیس و تشکیل میں ہمارا بنیادی کردار ہے جو شہید عارف حسینی کے خوابوں کی تعبیر ہیں۔ وہ اپنی زندگی میں ایسے اتحاد کے لیے کوشاں رہے اور عوام کو باہمی وحدت کے لیے عملی جدوجہد کا درس دیتے رہے آج یقینا اتحاد و وحدت سے ان کی روح شادمان ہو گی۔
قائد ملت جعفریہ پاکستان نے یہ بات زور دے کر کہی کہ شہید کے پیروکاروں کو چاہیے کہ وہ شہید قائد کی شخصیت کا روشن فکری کے ساتھ مطالعہ کریں اور ان کے نقش قدم پر چلتے ہوئے امت مسلمہ جیسے غزہ، فلسطین و لبنان اور کشمیر کے مظلوم مسلمانوں کے لئے آواز بلند کرنے کے ساتھ ساتھ پاکستان میں محروم و مظلوم طبقات کو درپیش مسائل کے حل، فرقہ واریت کے خاتمے، طبقاتی تقسیم، بد عنوانی، بے راہ روی اورمعاشرتی مسائل کے حل کے لیے جدوجہد کریں۔ اس کے علاوہ پاکستان کو درپیش تمام بحرانوں کے خاتمے کے لیے مکمل عزم اور جذبے کے ساتھ آگے بڑھتے رہیں۔
