محسن انسانیت حضرت امام حسین علیہ السلام اور ان کے جانثار ساتھیوں کی یاد منانا عظیم عبادت ہے، ان کے تمام تذکار کو زندہ رکھنا ضروری ہے، کیونکہ آپؑ نے حق و صداقت کی خاطر اپنے عزیزوں اور ساتھیوں کی قربانی دی، اسلام کی سربلندی کے لئے یزید کی بیعت سے انکار کیا اور ظلم و جبر کے سامنے ڈٹ گئے۔
راولپنڈی/اسلام آباد: قائد ملت جعفریہ پاکستان علامہ سید ساجد علی نقوی نے کہا ہے کہ محرم الحرام اور صفر المظفر میں شہدائے کربلا کی یاد میں مجالس عزا اور جلوس ہائے عزا کا انعقاد ہمارے ایمان کا حصہ ہے۔ یہ ایام ہمیں اس عظیم قربانی کی یاد دلاتے ہیں جو حضرت امام حسینؑ اور ان کے ساتھیوں نے راہِ حق میں دی۔
علامہ ساجد نقوی نے مزید کہا کہ شہدائے کربلا کی قربانی کا مقصد دین کو زندہ رکھنا اور ظلم کے خلاف آواز بلند کرنا تھا۔ یہ ایام ہمیں اتحاد، قربانی، صبر اور ایثار کا درس دیتے ہیں۔ انہوں نے کہا کہ مجالس عزا اور جلوس ہائے عزا میں زیادہ سے زیادہ شرکت کر کے ہم نہ صرف شہدائے کربلا کو خراج عقیدت پیش کرتے ہیں بلکہ اپنی نئی نسل کو بھی ان کے مشن سے آگاہ کرتے ہیں۔
انہوں نے کہا کہ حضرت امام حسینؑ کی جدوجہد قیامت تک حق و باطل کے مابین کسوٹی رہے گی۔ آپؑ نے ظالم حکمران کے سامنے ڈٹ کر یہ ثابت کر دیا کہ باطل کے سامنے سر جھکانا کسی مومن کے شایانِ شان نہیں۔ ان کی قربانی ہر دور کے مظلوموں کے لئے مشعل راہ ہے۔
علامہ ساجد نقوی نے اس موقع پر انتظامیہ سے مطالبہ کیا کہ چہلم امام حسینؑ کے موقع پر عزاداروں کو مکمل سہولیات فراہم کی جائیں اور سیکیورٹی کے مؤثر انتظامات کئے جائیں تاکہ عزاداری بخیر و خوبی اختتام پذیر ہو۔
آخر میں انہوں نے کہا کہ ہمیں چاہیے کہ شہدائے کربلا کے پیغام کو اپنی زندگی کا حصہ بنائیں اور دنیا کو یہ پیغام دیں کہ باطل کے خلاف ڈٹ جانا ہی حقیقی آزادی ہے۔
