منڈی بہاؤالدین میں ذخیرہ کی گئی گندم کے گوداموں پر چھاپے کے دوران 400 ٹن گندم برآمد کرلی گئی۔
اسسٹنٹ کمشنر غزالہ یاسین چدھڑ نے بتایا کہ چھاپہ بکن اور چوٹ دھیراں میں ذخیرہ کی گئی گندم کے گوداموں پر مارا گیا۔
اسسٹنٹ کمشنر نے کہا کہ چھاپے کے دوران گوداموں سے 3 کروڑ روپے مالیت کے 400 ٹن گندم کے 10 ہزار تھیلے برآمد کیے گئے۔
اسسٹنٹ کمشنر کے مطابق برآمد کی گئی گندم کو فلور ملزبھیج دیا گیا ہے، جس کے بعد آٹے کو سرکاری ریٹ پر فروخت کیا جائے گا۔
مظفرگڑھ: سیلابی پانی پاسکوکےگودام میں داخل،کروڑوں روپےکی گندم خراب ہوگئی .
مظفرگڑھ کی تحصیل علی پور میں سیلابی پانی پاکستان ایگریکلچر اسٹوریج اینڈ سروسز کارپوریشن لمیٹڈ ( پاسکو) کےگودام میں داخل ہوگیا جس کے باعث کروڑوں روپےکی گندم خراب ہوگئی۔
پاسکو ذرائع کے مطابق علی پور کے قریب عظمت پور زمیندارہ بند ٹوٹ گیا جس کے باعث سیلابی پانی پاسکو کےگودام میں داخل ہوگیا، پانی داخل ہونے سے وہاں موجود کروڑوں روپے مالیت کی گندم خراب ہوگئی۔
بند ٹوٹنے سے درجنوں بستیاں اور ہزاروں ایکڑ فصلیں بھی زیر آب آگئی ہیں اور دیگر علاقوں سے زمینی راستہ بھی منقطع ہوگیا ہے۔
ڈپٹی کمشنر کے مطابق ہیڈ پنجند کے قریب پاسکو کے دوسرے سینٹرکو پانی سے بچانے کے لیے حفاظتی اقدامات کیے جارہے ہیں۔
ڈپٹی کمشنر کا کہنا ہےکہ 2 روز میں 20 ہزار سے زائد افراد محفوظ مقامات پر منتقل کیے گئے۔ دریائے چناب میں پانی کے بہاؤ میں مسلسل اضافہ ہو رہا ہے۔
