باہمی اختلافات سے گریز و اجتناب اور اخلاقی قدروں کی پاسداری انتہائی ضروری ہے، ہم آواز ہو کر عزاداریِ سید الشہدا کے فروغ میں مؤثر کردار ادا کریں. قائد ملت جعفریہ پاکستان علامہ سید ساجد علی نقوی۔

29 جنوری 2026

قائد ملت جعفریہ پاکستان علامہ سید ساجد علی نقوی نے اپنے بیان میں کہا ہے کہ موجودہ بین الاقوامی بالخصوص امت مسلمہ کو درپیش چیلنجز کے پیشِ نظر، اتحاد و وحدت کیلئے کوششیں جاری رکھنی چاہیئیں اور سوشل میڈیا و عوامی پلیٹ فارمز پر باہمی اختلافات سے گریز و اجتناب اور اخلاقی قدروں کی پاسداری انتہائی ضروری ہے۔

ان خیالات کا اظہار انہوں نے شیعہ علما کونسل شمالی پنجاب کے صوبائی صدر علامہ اشتیاق حسین کاظمی، صوبائی ڈپٹی جنرل سکٹریری ذاکر سید عمران حیدر بخاری(گڈو شاہ)، صوبائی سکٹریری اطلاعات مرید کاظم جعفری اور صوبائی معاون امید علی علوی سے ملاقات کے دوران کیا۔ اس موقع پر شیعہ علما کونسل شمالی پنجاب کے صوبائی صدر علامہ اشتیاق حسین کاظمی نے موجودہ حالات کے تناظر میں اتحاد بین المومنین، مذہبی و تنظیمی حوالوں سے قائد ملت جعفریہ پاکستان کو مفصل رپورٹ پیش کی جس پر علامہ سید ساجد علی نقوی نے وفد کی رہنمائی فرمائی۔

قائد ملت جعفریہ علامہ ساجد نقوی نے مزید کہا کہ وقت کا اہم تقاضا ہے کہ علما و ذاکرین اتحاد و وحدت، احترام و رواداری، تحمل و برداشت اور ہم آواز ہو کر عزاداریِ سید الشہدا، سیرت و اخلاق اہلبیت علیھم السلام کے فروغ و تحفظ کیلئے حسبِ سابق اپنا مثبت و مؤثر کردار ادا کریں۔ قائد محترم نے صوبائی صدر و کابینہ کے ارکان کو ہدایت کی کہ ماحول و صورتحال کو سازگار بنانے کیلئے فوری طور پر مثبت، موثر اور عملی اقدامات کریں۔