یوم رواداری بھی فقط کاغذی اعلان، مظلوم فلسطینی آج بھی ناروائی کا شکار ،قائد ملت جعفریہ پاکستان
رواداری انسانی تقاضا اور فطرت کی پکار ہے، 8دہائیاں گزرنے کے باوجود آج بھی دنیا میں روا داری کا وجودنہیں، علامہ سید ساجد علی نقوی
تمکین فی الارض پانے والوں نے امر بالمعروف و نہی المنکر کے اقدامات نہ کرکے رواداری کا راستہ روکا، یوم رواداری پر پیغام
راولپنڈی /اسلام آباد 15 نومبر2025ء : قائد ملت جعفریہ پاکستان علامہ سید ساجد علی نقوی کہتے ہیں کہ یوم رواداری پر بھی غزہ میں فلسطینیوں پر ظلم و جبر کی تاریک رات ہے،رواداری انسانی تقاضا اور فطرت کی پکار ہے، 8دہائیاں گزرنے کے باوجود آج بھی دنیا میں روا داری کا وجودنہیں،اقوام متحدہ آج تک اپنا ہا ئو س ان آرڈر نہ کرسکا،طاقت وروں نے بین الاقوامی ادارے کی ساکھ کو مجروح کردیا، فلسطین و کشمیر کیساتھ دنیا کے کئی خطے عدم برداشت اور مظالم کی تصاویر ہیں ، معاشروں میں رواداری قائم رہتی اور صیہونی ریاست جیسے ظالموں کے آگے سرتسلیم خم کرنے کی بجائے نکیل ڈالی جاتی تو آج دنیامیں کم از کم کسی حد تک سکون و اطمینان ضرورہوتا ۔
ان خیالات کا اظہار انہوںنے بین الاقوامی یوم رواداری پر اپنے پیغام میں کیا۔ قائد ملت جعفریہ پاکستان علامہ سید ساجد علی نقو ی نے کہاکہ رواداری انسانی تقاضا اور فطرت کی پکار ہے ، تمام مذاہب نے رواداری پر زور دیا البتہ اسلام میں اس کی بڑی اہمیت ہے جبکہ قرآن و سنت کی طرف سے بڑی تاکید ہے۔ سماج میں روداری ہی وہ بنیادی عنصر ہے جس کے سبب معاشرے اعتدال پر قائم رہتے ہیں اور زندگی پرسکون ہوتی ہے۔
8دہائیاں قبل اقوام متحدہ کے قیام کا بنیادی مقصد بھی انسانی حقوق کی فراوانی، بین الاقوامی جارحیت و اجارہ داری کا خاتمہ اور تہذیبوں کے ٹکرائو کو کم سے کم کرکے رواداری کو فروغ دینا تھا مگر افسوس سب کچھ اس کے برعکس ہوا۔ اقوام متحدہ نہ صرف بین الاقوامی سطح کا سب سے بڑا اور موثر فورم لہٰذااسے کسی خاص خطے یا ملک یا ایک طاقت ور کا آلہ کار نہیں بننا چاہیے بلکہ انسانی حقوق ، مساوات اور رواداری کیلئے رہنمائی کا کردار ادا کرنا چاہیئے جس میں آج تک یہ بدقسمتی سے کامیاب نہیں ہو نے دیا گیا۔
قائد ملت جعفریہ پاکستان علامہ سید ساجد علی نقوی نے یوم رواداری کے حوالے سے مزیدکہاکہ امربالمعروف و نہی عن المنکرمیں بھی اولین تقاضا رواداری ہے، جس کے لئے اقدامات کرنا تمکین فی الارض پانے والے حکمرانوں کی ذمہ داری ہے دونوں مفقود ہیں۔ معاشرے میں گھٹن کے ماحول کے خاتمے کیلئے بھی بنیادی امر رواداری و باہمی احترام ہے جس پر چل کر معاشرے میں اعتدال کیساتھ ساتھ ترقی و استحکام بھی پروان چڑھتا ہے ،خدا ہمیں ہدایت دے ۔
